வெல்வோம் நாம்

தாய்த் தமிழகத்தின் ஈழத்தமிழ் ஆதரவுப் போராளி
திரு.தொல்.திருமாவளவனின்
சாகும்வரையான உண்ணாநிலைப் போராட்டத்தினை ஆதரித்து நோர்வே வாழ் தமிழ்மக்கள் அன்பையும் வாழ்த்தையும் தெரிவித்துக்கொள்கின்றனர். தமிழாசான் பதிவேடு இணைவலையும் உளமாற வாழ்த்துகிறோம்.உன்னத்தமிழனுக்கு உலகம் என்றும் பின்னிற்கும்.

திருமாவளவன் அண்ணாவிற்கு...

திலீபனை இழந்தோம்
பூபதி அம்மாவையும் இழந்தோம்
மறைமலை நகரிலே உண்ணாநிலையில்
உங்களையும் இழப்பதா?

அறவழிப் பாதையில் விழுந்து
ஆயுதப் போரிலே எழுந்தோம்
அதுபோதும் மீண்டும்
அறவழிப் பாதையில் வீழ்வதா?

இலங்கையில் போரை நிறுத்த
இறுதி வழியாக நினைத்து
உறுதியாய் எழுந்த உங்களை
எங்கள் இதயங்களில் சுமக்கிறோம்.

உங்கள் கருத்துகள் வெல்லட்டும்
நாங்கள் வாழ்த்துகிறோம்
உங்களை இழந்த பிறகு
நாங்கள் வெல்வதை விரும்பவில்லை!

வடக்கு வாசலில் குந்தியிருந்து
வயிறு நிறைய உண்டு
மனம் மகிழும் மந்திரிகளுக்கு
உங்கள் பசியின் அருமை புரியாது!

நீர்த் தடாகங்களில்
நீச்சலடிக்கும் மீன்களால்
நெருப்புக் கடலில்
நீச்சலடிக்க எப்படி முடியும்?

மரணத்தின் எச்சங்களுக்கு நடுவில்
வாழ்ந்தே பழக்கமில்லாதவரிடம்
மரணக் குழிகளில் வாழ்வது பற்றி
எப்படி வாதிட முடியும்?

இந்த உலகத்தின்
விளிம்புகளை எல்லாம்
அதிர வைத்திடும் உங்கள்
குரல் எமக்கு வேண்டும்.

காசாவிற்கு குரல்கொடுக்க
ஆயிரம் தலைவர்கள் இருக்கலாம்
ஈழத் தமிழருக்காய் குரல்கொடுக்க
என்றும் நீங்கள் வேண்டும்.

காசாவில் அமைதியைத் தேடும்
உங்கள் இந்தியப் பிரதமருக்கு
இலங்கையில் நிகழும் போரை
நிறுத்திட மனமில்லையே... ஏன்?

வசீகரன்
நோர்வே
18.01.2009
நன்றி வசீகரன்

பொங்குதமிழ்

பொங்குதமிழ்
தமிழ் கூறும் நல்லுலகத்தில் வாழும் அன்புறவுகளே!
தமிழகத்தில் அரிசிப்பொங்கல் தமிழீழத்தில் அரத்தப்பொங்கல்
கதிர் தோன்றினாலும் ஒளி இல்லையே
மொழி இருந்தாலும் நாடில்லையே
உறவுகள் இருந்தாலும் உதவியில்லையே
இருந்தாலும் தடைகள் தொல்லையே
விடியவில்லையே பொங்குவதற்கு

பிறந்த நாட் செய்தி

இந்துமாவாரியில் மூழ்கியுள்ள குமரிக்கண்டத் தென்கோடியில் கி.மு.50,000(ஐம்பதினாயிரம் ) ஆண்டிகளுக்கு முன்பே முழுவளர்ச்சி அடைந்த தமிழே உலக முதல் உயர்தனிச் செம்மொழியும் திராவிடத்தாயும் ஆரிய மூலமும் ஆகும். தேவமொழியென்று ஏமாற்றித்
தமிழகத்திற் புகுத்தபட்ட சமற்கிருதம் என்னும் வடமொழியாலேயே தமிழ் தாழ்த்தப்பட்டது. அதனால் தமிழனும் தாழ்த்தப்பட்டான். தமிழன் மீண்டும் முன்னேற்வதற்குத் தமிழ் வடமொழியினின்றும் விடுதலையடைதல் வேண்டும். வடமொழியினின்று தமிழை மீட்பதே என் வாழ்க்கைக் குறிகோள். தமிழ் உயர்ந்தால்தான் தமிழன் உயரமுடியும்.அதற்குத் தமிழர் இனி எல்லா வகையிலும் தமிழையே போற்றுதல் வேண்டும்.முதற்கண் தமிழர் அனைவரும் தமிழ்ப் பெயர் தாங்கல் வேண்டும். ஆண்டில் ஒரு நாளைப் பெயர் மாற்றத் திருநாள் என்று இனி ஆண்டுதோறும் கொண்டாடி வருவது நன்று.பிறந்த அண்மையிற் பிறமொழிப் பெயர் பெற்றவரெல்லாம் அந்நாளில் தம் பெயரைத் தனித் தமிழ்ப் பெயராக மாற்றிக்கொள்ளலாம்.அதை இல்லத்தில் விழாவாகக் கொண்டாடுவதுடன் ஊர்வலத்தாலும் ஊரார்க்கறிவிக்கலாம்.

தமிழ்ப்பெயர் தாங்குபவரே உண்மைத் தமிழராவர்.தமிழ்ப் பெயர் ஏற்றபின் தமிழிலேயே திருமணத்தையும் இருவகைச் சடங்குகளையும் செய்தலும் செய்வித்தலும் வேண்டும்.கடவுள் நம்பிக்கையுள்ளவர் திருவழிபாட்டையும் தமிழிலேயே ஆற்றுதல் வேண்டும்.

இங்ஙனம் தொடர்ந்து செய்துவரின் இன்னும் ஐந்தாண்டிற்குள் தமிழர்தம் அடிமைத்தனமும்,அறியாமையும் அடியோடு நீக்கி மேலையர்போல் புதுப்புனைவு தலைப்படுவர் என்பது திண்ணம்.

ஆங்கிலர் நீங்கியதால் தமிழ்நாடு விடுதலையடையவில்லை. ஆரியம்நீங்குவதே உண்மையான தமிழர் விடுதலையாம்.

ஆசான்: தேவநேயப்பாவாணர் நூல் : தமிழ் வளம்.

வரைபடங்கள்பற்றி

வரைபடங்கள் உருவாக்கும் கலையான கார்ட்டோ கிராஃபி ( cartography) மிகப் பழைமையானதொன்று. நாடுகளின் எல்லைகளைக் காட்டவும், கடற்பயணம் மேற்கொள்ளவும் வரைபடங்கள் முதலில் பயன்படுத்தப்பட்டன. பல நூற்றாண்டுகளுக்கு முன், வரைபடங்களை உருவாக்க ,கண்ணால் கண்டு சேகரித்த விவரங்கள் பயன்படுத்தப்பட்டன.இதனால் வரைபடங்கள் துல்லியமாக அமையவில்லை. மேலும் உருண்டையான பூமியில் உள்ள நிலப்பரப்புகளை தட்டையாக வரைபடத்தில் காட்டும்போது, பல பிழைகள் ஏற்பட்டன. கி.பி 2ஆம் நூற்றாண்டில் கிளாடியஸ் தாலமி தயாரித்த உலகப்படம், மத்தியதரைக் கடலைச் சுற்றியே உலகம் இருந்தது போலவும், ஐரோப்பா மற்றும் ஆசியாக் கண்டங்கள் பெரிதாக இருந்தது போலவும் காட்டியது. ரோமானியர்களும் எகிப்தியரும் இக்கலையில் தேர்ச்சி பெற்றிருந்தனர். கி.பி 12ஆம் நூற்றாண்டில் சீனாவிலும், 15ஆம் நூற்றாண்டில் ஐரோப்பாவிலும் வரைபடங்கள் அச்சிடப்பட துவங்கியதால், இக்கலை வெகுவாக முன்னேற்றம் அடைந்தது,வரைபடங்கள் பலருக்கும் கிடைக்கவும் வாய்ப்புகள் உருவாகின.

புதிய பூமி தேடி புறப்பட்டவருக்கு, முக்கியமாகக் கடலோடிகளுக்கு, வரைபடங்கள் இன்றியமையாதவை என்பதால் இக் கலையில் அரசர்களும் வணிகர்களும் ஆர்வம் காட்டினர். கையால் வரையப்பட்ட குத்துமதிப்பான வரைபடங்கள் பயன்படுத்தப்பட்டன. ஸ்பெயின் நாடடவர் இதற்கு உதாரணம். இங்கு உருவாகிய வரை படங்கல் பதினேழு, பதினெட்டாம் நூற்றாண்டுகளில் வடாமெரிகாவுக்கு கடற்பயம் செல்லப் பயன்படுத்தப்பட்டன. வெகுகாலத்துக்குப்பின் பத்தொன்பதாம் நூற்றாண்டில் புகைப்படங்களின் உதவியுடன் வரைபடங்கள் உருவாக்கப்பட்டன. அது இக்கலையில் ஒரு புரட்சியை ஏற்படுத்தியது.விமானங்களிலிருந்து எடுக்கப்பட்ட புகைப்படங்கள் வரைபடக்கலையில் ஒரு புதிய பரிமாணத்தை உருவாக்கின. வரைபடம் என்பது நிலத்தின் ஒரு பகுதியின் பிரதி. அன்று கையால் வரையப்பட்டவை இன்று கணினிகளால் உருவாக்கப்ப்டுகின்றன. மலைகளையும், ஆறுகளையும் காட்டும் வரைபடம், பயணவழிகளைக் காட்டும் வரைபடம் என பயன் கருதி வரைபடங்கள் உருவாக்கப்படுகின்றன.நிலப்பரப்பு, நீர்ப்பரப்பு மட்டுமன்றி மற்ற கோள்களின் மேற்பரப்புகளையும் காட்டும் அளவுக்கு இன்று வரைபடக்கலை வியக்கத்தக்க முறையில் முன்னேறியுள்ளது. வரைபடவல்லுநர்கள் காலம்காலமாகச் சில விதிமுறைகளைப் பின்பற்றுகின்றனர் என்றாலும் சிறு தவறுகள் ஏற்படுவது தவிர்க்கவியலாதது. புகைப்படங்களை ஆதாரமாகக்கொண்டு உருவாக்கப்படும் வரைபடங்களில்கூட நிலப்பரப்பில் காணப்படுபவற்றைத் துல்லியமாகக் காட்டவியலாது.

இன்று செயற்கைக்கோள் எடுத்த படங்கள் வரைபடங்களை உருவாக்க பயன் படுத்தப்படுகின்றன. இவற்றிலிருந்து, சில மீற்றர் பரப்பளவே உள்ள இடத்தைக்கூட கண்டறிய முடியும். ஈரக்போரில் அமெரிக்க ராணுவம் ஈராக் கவச வண்டிகளைத் தம் செயற்கைக் கோள் படங்கள் மூலம் கண்டறிந்து தாக்கியது ஒரு எடுத்துக்காட்டு. 20 ஆம் நூற்றாண்டின் மத்தியில் செயற்கைக்கோள்கள் சேகரித்த விவரங்களை வைத்து வரைபடங்கள் தயாரிக்க முடிந்தது. புவியியல் சம்மந்தப்பட்ட விவரங்கள் பலவற்றை அறிய பூமியை வலம்வரும் பலசெயற்கைக்கோள்களினால் சேகரிக்கப்படும் தகவல்கள் இதற்கு உதவுகின்றன. கணினியின் உதவியோடு அறிவியல் சார்ந்த துறைகள் பலவற்றுக்குப் பயன்படும் வரைபடங்கள் உருவாக்கப்படும் நிலை உருவாகியுள்ளது.உதாரண்மாக ஒரு அறையில் அமர்ந்தவண்ணம், செயற்கைகோள் படங்களைப் பார்த்து நகரங்கள் அபிவிருத்தியடைவது, விவசாயநிலத்தின் பரப்பு அதிகரிப்பது அல்லது குறைவது, காடுகளின் சேதம், நீர் நிலைகள் மாசுபடுவது போன்ற பல விவரங்களைப் பெறலாம்.

ஆசிரியர்: சு.கி.ஜெயகரன் நூல்:குமரி நிலநீட்சி

இனப்படுகொலை ( Genocide )

நிறுத்து கொத்தணி குண்டுகளை போடுவதை நிறுத்து மண்டிக்கேட்கிறது வெண்புறா

வீடுகளிலும் குண்டுகள் - ஓடும்

சாலைகளிலும் குண்டுகள்
மூத்தோர் மேலும் குண்டுகள்

பாலகர் மீதும் குண்டுகள்

பார்த்துக் கொண்டெ

இருக்கலாமாஉலகம்!!!!!!

உலகே உனக்கு கண்ணில்லையா

தமிழீழ மண்னென்ன மண்ணில்லையா

உனது மக்கள் தான் மக்களா - எம்

தமிழீழ மக்கலென்ன கற்களா
:காசியானந்தன்: